我係汪永全,嚟自鹿特丹,今日同我一齊來嘅,仲有侯澤權、王運廷、鄧就明、蔡志楷。我哋懷著沉重、依依不捨嘅心情嚟到呢度,向我哋嘅摯友陳貴武先生告別。作為上述幾位嘅代表,我知道就算用盡世間上所有詞句,都唔足以表達我哋失去呢位知己嘅感受,衹祈望大家能夠喺我嘅講話裏面,知道多一啲陳貴武先生嘅生平,使我哋領悟到友情嘅可貴,更加珍惜同埋感恩。

陳貴武」,我哋叫佢做亞陳、亞武,祖籍溫州永強,1957年在香港出生,16歲嚟荷蘭喺佢哥哥餐館打工,其後合股經營「東方餐館」,喺佢嘅哥哥過身之後,繼續與嫂嫂及幾位侄兒營運至2001年。亞武有一段婚姻,3個女兒,係一位勤儉顧家嘅好爸爸。我哋跟亞武相識已經有二十幾年,可能唔稱得上係佢最耐嘅朋友,亦未必係交往最頻密嘅明友,但有一點可以肯定,我哋全部都係最真誠嘅朋友 。

亞武喜歡音樂,我哋嘅故事亦係由音樂開始,由於佢十分渴望結交音響發燒友,1988年秋天,喺一個細雨綿綿嘅週末,亞武單人匹馬從烏特勒支坐火車嚟到鹿特丹,拜訪素末謀面嘅侯澤權。從此之後,佢成為我哋當中嘅一份子,再不分離,我哋一齊欣賞音樂、參加音響展銷會、組織HiFi活動、打羽毛球。我哋永遠唔會忘記哪假日燒烤的歡樂、把酒談天嘅暢快、為荷蘭足球打氣時嘅瘋狂。我哋友誼不斷發展,延伸至生活嘅其他層面：互相關心對方嘅家庭狀況、事業發展及子女嘅成長,共同面對人生嘅高低起伏,喺喜慶歡欣時分享喜悅,喺哀傷憂慮時分擔痛苦。令人印象深刻嘅係亞武經常向大家,尤其係非教徒朋友,介紹基督教信仰,生命堂教會活動、佢作為基督教徒應有嘅人生觀。

我哋知道佢患上絕症已經有近3年,係經由佢本人講俾我哋聽,我記得當時佢嘅情緒一啲都冇波動,好似喺度講緊其他人嘅故事,我哋嘅傷感反而要由佢親自一一去撫慰。喺隨後嘅日子裏面,我哋除咗不斷以電話電郵聯繫之外,亦刻意安排一啲聚會和活動,有時祇係簡單嘅談天話舊、又或者外出探訪老友或食自助餐,目的係希望為亞武同大家留下一啲雪泥鴻爪、歷史回憶。雖然我哋知道世事變幻、人生無常,但每次見面嘅時候,想到眼前活生生嘅亞武,將會喺唔知邊一日,會忽然間離我哋而去,內心不禁悽然。喺呢3年以來,亞武表現得無比堅強,無論遇到幾多艱難挫折,從來唔會怨天尤人。佢對自己嘅病亦情毫不避忌,總係話俾我哋聽佢正在做緊邊一類嘅療程,進展如何,亦唔接受我哋給予佢嘅特別關照,對所謂「病人待遇」毫不領情,而我哋亦通常忘記咗佢其實係一個患咗重病嘅人。亞武幾時都係關心別人多過別人關心自已,佢待人熱誠、樂於助人嘅高尚品格始終如一。記得喺今年嘅1月9日,我一個人由鹿特丹出發到Utrecht松柏會,主持老人金講座,之前我早已經決定今次唔會驚動亞武,但係揸車到半路嘅時候,我實在好掛住佢,卒之打電話俾佢:「我來緊Utercht啦!」。亞武呢個人,絕對唔會埋怨你點解咁遲先至通知佢,我喺電話度聽到佢急促嘅回答：「你小心揸車,我馬上就過來會合你」,佢冒住嚴寒嘅天氣,踩單車趕去會場,當我見到佢,大家雙手緊握嘅時候,我感動到幾乎講唔出說話,原來有一個對你咁真摯嘅朋友,係幾咁幸福呢？相信在座各位,喺與亞武相處嘅經歷裏面,亦都有我同一樣嘅感受,亞武對每一個人、每一個朋友都係咁親切關懷、真情流露。

前日我收到「高寧根基督教生命堂」,張堯傳道嘅一封通告電郵,呼籲各生命堂牧者、傳道同工、主內弟兄姊妹在禱告中,記念身患癌病嘅某位姊妹,求主親自施恩憐憫,好讓佢能夠活出一個影響佢週邊親友嘅生命見證。喺我哋一班好朋友嘅心中,亞武已經活出足以影響大家嘅生命見證,佢係一個十分平凡嘅人,亞武留俾我哋最重要嘅訊息就係:「生命無論是否短暫,活著就是精彩」。

喺亞武去世之前嘅星期日,我哋一班包括亞武在內嘅朋友,原本約好喺鹿特丹舉行燒烤聚會,後來因事两次更改,最後訂在9月16號,即係來緊嘅星期日,亞武雖然已經係安息主懷,但兩日後嘅燒烤Party,我哋決定繼續,藉此作為對亞武嘅紀念,緬懷我哋曾經一同渡過嘅快樂時光,我哋歡迎亞武嘅其他朋友参加。悲傷當然唔會立刻消退,但亞武嘅樂觀豁達精神將長留人間,友誼亦永記於大家心中,到時我哋縱使仍然有些傷感,但亦清楚知道亞武對我哋嘅啟示：就係「開心踏實地過好每一天」！亦會更加懂得感恩和珍惜。讓大家手牽手,一齊為我哋嘅好朋友陳貴武告別。最後向亞武嘅遺屬致以最誠摯嘅慰問,並感謝俾機會我哋,今日能夠係呢度講出內心嘅說話,作為對亞武嘅衷心敬禮。